Shillong-ah River Festival zawh fel a ni

Shillong Meghalaya-a ni hnih awh River Festival – NADI 2016 neih chu Inrinni khan zawh a ni a, India, Bangladesh, Bhutan, Nepal leh Myanmar ram te an tel a ni.

River Festival hi Asian Confluence, India, East Asia Centre, Shillong leh Maulana Abul Kalam Azad Institute of Asian Studies ten an buatsaih a ni. River Festival buatsaihtute chuan hmarchhakin tuipui hmanga a ṭhenawm ram te nen kawng hrang hranga insumdawn tawnna leh inlaichinna ṭhazawk a awm theih nana buatsaih a nih thu an sawi. He festival hmanpuitu Bangladesh Tourism and Civil Aviation Minister Rashed Khan Menon chuan Tourism lama India, Bangladesh leh hmarchhak state ten hma an sawn theih nan chuan direct flight Dhaka-Shillong, Dhaka-Guwa-hati leh Dhaka-Kolkata-Agartala te a awm a ngai a ni, a ti.

Menon chuan direct flight a awm theih nan leh Shillong aṭanga Bangladesh khawpui awlsam zawka pawh turin ram pahnih te chuan hma an lak mek thu a sawi. Buddhist tourism circuit tih changtlun kawngah Bangladesh leh Arunachal Pradesh te chuan hma an lak tur thu Menon chuan a sawi bawk.

Meghalaya Chief Minister Mukul Sangma chuan Meghalaya leh Bangladesh te chuan inzawmna ṭha zawk an siam a ṭul thu a sawi ve bawk. Bangladesh Foreign Affairs Minister Shahriar Alam, High Commissioner of Bangladesh to India Syed Muazzem Ali, Mizoram Chief Minister Lal Thanhawla leh Nepal Water Resources Minister hlui bakah ram panga aiawhin mi pawimawh tak tak te an kal khawm a ni.