Assam tuilian la reh lo

Assam-a tuilian chuan ziaawm lam a la pan thei lo a, Inrinni khan district paruka mihring nuai 1.88 zet te chuan tuilian hi an la tuar tih tarlan a ni.

Assam-a lui lian ber Brahmaputra leh a fintu lui dangte chu an chim chin a sang zel a, Lakhimpur, Golaghat, Morigaon, Jorhat, Dhemaji leh Biswanath district te chu tuilian hian a chim mek tih Assam State Disaster Management Authority (ASDMA) chuan an tarlang. Tui lian hian thingtlang khua 300 vel zet te chu a chim tawh a, thlai chinna hmun hectare16,240 vel zeta zau a chim tawh a ni. Brahmaputra lui hian Nematighat, Dikhow leh Numaligarh-ah te chuan hlauhawm chhinchiahna a pel vek tawh a ni. Jorhat leh Golaghat District thuneitute chuan chenna neilote tan relief camp 21 zet an buatsaih sak tawh a, mi 3,811 vel te chuan himna zawngin an in leh lo an chhuahsan tawh bawk.

Hriat theih chinah Assam-a thingtlang khaw 244 vel zet te chuan tuilian hi an tuar mek a, chenna leh eitur mumal nei tawh lo mi eng emaw zat an awm a ni. State sorkar chuan tuilian tuarte chanchhuah hna hi a thawk ve reng bawk. Kum tin Assam-ah hian mi tam takin tuilian avangin harsatna an tawk ṭhin a, tunhnai khan State sorkar chuan tuilian laka invenna tur hian United Bank of India-ah pawisa puk turin ruahmanna a siam a, a thuphung chuan pawm a ni tawh a ni.