Arunachal CM thar Pema Khandu

Hun rei tak chhung Arunachal Pradesh politics a buai hnuah Congress hruaitu kum 37 mi lek Pema Khandu chu Chief Minister pakuana ni turin Pathianni khan Arunachal Pradesh Governor nihna chelh lailawktu Tathagata Roy chuan a la lut ta. Pema Khandu hi India rama chief minister naupang ber a ni.

Pema Khandu hi Congress MLA atan ṭum hnih thlan tlin a ni tawh a, amah hi Arunachal Pradesh Chief Minister hlui Dorjee Khandu fapa a ni. Congress CM hlui Nabam Tuki chuan a lal ṭhuthleng kalsanin House-a floor test hmachhawn ngai loin Pema Khandu hi lakluh a ni ta a, a rual hian Deputy Chief Minister atan Congress hruaitu hlun Chowna Mein chu lakluh a ni nghal bawk. Governor Tathagata Roy chuan Pathianni khan Raj Bhavan Darbar Hall-ah rinawmna thu tiam tirin a lalut a ni. Chief minister lawmluhna inkhawmah hian Nabam Tuki leh Chief Minister kalchhuak ta Kalikho Pul bakah Speaker Nabam Rebia, party hrang hrang MLA, AICC secretary in-charge Dr K Jayakumar, State Congress president Padi Richo leh State sorkar mi pawimawhte an tel ṭha hle.

Pema Khandu chuan a pain chief miniter a nih chhunga hna a lo thawh tawhte chhunzawm a tum thu leh, a tihhlawhtlin hman loh tam tak te tihlawhtling thei tura hun ṭha a nei chu vannei a intih thu a sawi. Dorjee Khandu hi kum 2011 khan thlawhtheihna chesualah a boral a ni. Pema Khandu chuan an ram leilung hausakna te chu a tam thei ang ber haichhuah a ṭul thu sawiin, tourism, agriculture, horticulture leh social sector bakah health, education leh communication te chu ngaihpawimawh hmasak a nih tur thu a sawi bawk.

CM thar chuan Nabam Tuki hun laia Congress MLA te helna chu hrerengin thawhhona ṭha siam a tum thu a sawi a, Congress an ni emaw, BJP leh Independent emaw pawh nise team anga ṭha taka thawk ho tura hma a lak tur thu a sawi a ni. Politics aia hmasawnna chu dah pawimawh zawk a ṭul thu sawiin, "Hmasawnna hna thawk turin mipui ai awhin ka pen chhuak a ni", a ti. Prime Minister Narendra Modi kaihhruai NDA sorkar chuan an state hmasawnna chu ngaihthah lo tura a duh thu a sawi zauh bawk. Mega power project kalpui mek chu tihkhawtlai a nih loh nan leh a hun tak zawh a nih theih nan hma a lak tur thu sawiin power chu state intodelh nana pawimawh ber a ni, a ti. Gerukamukh-a MW 2000 pe chhuak thei tur Lower Subansiri hydroelectric project kalpui mek chhungchangah ṭhenawm state Assam Chief Minister Sarbananda Sonowal chu inbiakna a neihpui tur thu a sawi bawk.

Pema Khandu hian ni reilo te chhungin a cabinet minister turte a siam fel rin a ni a, senior leh kum lama la naupang zawkte a ruat pawlh rin a ni. Tripura Governor Tathagata Roy chuan AP Governor nihna hi a chelhkawp a, a zin chhuah nghal avangin Minister thar te hi AP-a a let leh hunah lakluh a ni ang. Deputy Chief Minister thar Chowna Mein chuan CM Pema Khandu chu kum 37 mi lek mah nise a rilru a puitlin thu sawiin, sorkar ṭha tak an din theih a beisei thu a sawi a ni.

Pema hian thlawptu MLA 47 a nei a, an zingah hian independent MLA pahnih an tel. Congress sorkar paithlak a nih theih nana sulsutu ber leh thla reilote chhunga Arunachal Pradesh CM nihna chelhtu Khaliko Pul chuan a rilru thlakin amah leh MLA dang 30 te chuan Congress an thlawp thu an sawi a ni. AP hian House-ah member 60 a nei mek a, tuna Congress sorkar ding thar leh hian thlawptu MLA 47 a nei a ni.

Pema Khandu bihchianna

θ Pema Khandu hi Arunachal Praesh CM hlui, Dorjee Khandu fapa upa zawk a ni

θ An chhungkua hi Monpa tribe an ni

θ Football, cricket, badminton leh volleyball te a ngaina hle

θ Bodhi Language & Literature Promotional Society-ah chairman a ni ṭhin

θ Delhi Hindu College aṭangin a graduate

θ A pa hnung zuiin kum 2000 khan Congress party a zawm

θ Kum 2005-ah Arunachal Pradesh Congress Committee Secretary atan ruat a ni

θ 2010-ah Tawang District Congress Committee Secraetary atan ruat leh a ni

θ A pa hmun ruak luah turin kum 2011 khan Arunachal Pradesh Assembly-ah lakluh a ni

θ Assembly election-ah a pa dinna ṭhin Mukto bial aṭangin chuhtu awm loin ṭum hnih thlan tlin a ni a, Cabinet Minister atan ruat a ni a, Water Resources Development leh Tourism a enkawl

θ November 21, 2011 khan Nabam Tuki chief minister-na hnuaiah Rural Works Department (RWD) leh Tourism te a enkawl leh a, Civil Aviation leh Art & Culture Deparment te a enkawl zui bawk.

θ June 1, 2014 khan Tuki chuan Urban Development Minister atan a ruat

θ Kum 2015 October khan Kalikho Pul leh MLA dangte nen Congress party aṭanga helin Minister nihna a bansan zui

θ Congress Legislature Party leader atan 16 July 2016 khan ruat a ni

θ July 17, 2016 khan Arunachal Pradesh Chief Minister pakuana ni tura lakluh a ni