Assam-ah samak ki la khawm dawn

Assam sorkar chuan State treasury-a samak ki awm zat tichiang tur leh thli thlai turin committee a din. A hmasa ber atan Inrinni khan Guwahati-ah meeting an nei a, State Information Commissioner (rtd) Mohan Chandra Malakar chu permanent chairman atan ruat a ni a, Senior Wildlife Warden Pankaj Kumar Sharma chu member secretary atan ruat a ni bawk.

Committee-a hian Principal Secretary (Forest) Sanjeeva Kumar, PCCF (wildlife) Bikash Brahma, Kaziranga director Satyendra Singh, deputy director DD Boro, journalists Mrinal Talukdar leh Prashanta Rajguru, Treasury Officer Pranab Sarma, Deputy Director of State Forensic department Athang Singson, Kaziranga DFO Suvasish Das leh RTI activist Dilip Kumar Nath te chu member an ni.

Committee chuan DFO leh treasury officer te chu district treasury-a Samak ki an kawlte state sorkarah pe lut turin hriattirna a chhuah nghal a, July 26 khian an ṭhukhawm leh ang. State treasury 13-a Samak ki an kawl lai hi 2,000 vel niin an sawi a, chung zinga 1,600 te chu Golaghat ami vek a ni. Golaghat, Nagaon, Sonitpur, Guwa-hati, Lakhimpur, Jorhat leh Barpeta te chuan Sakamk ki a ṭhena zar an kawl ve nia hriat a ni bawk.

Assam Forest department hian khawvel hmun hrang hrang Museum-a dah turin Samak ki te hi an thawn chhuak ṭhin tih a sawi. Kumtin Assam-ah hian mihring te thah nilo, an upat vang te, natna vang te leh chhan hrang hrang vangin samak 50 vel an thi ziah anga ngaih a ni.

Hetih lai hian tunhnai khan Assam Special Task Force (STF) te chuan samak peltu mi pali an man. Assam Police te chuan Pathianni khan samak vawi tam tak kap tawh nia sawi leh an zawn mek Abdul Hanan chu Marigaon district-ah an man a, a rual hian mi pathum Foto Marak, Kana Lama leh Moniram Orang te chu an man ve bawk. Am mi mante kut aṭang hian .303 rifle, 303 magazine, .22 rifle leh silaimu eng emaw zat an man tel a ni.

Marigaon district hi samak tamna Pabitora Wildlife Sanctuary awmna hmun a nih avangin police te chuan samak kap ṭhintute zawn hna hi an thawk ṭhin a ni. Tunhnai khan police te chuan Karbi Kaziranga National Park (KNP) awmna Anglong district-ah silai leh a mu eng emaw zat an lo man tawh bawk.

Tunlai hian Assam-ah nasa taka tui a len mek avangin Kaziranga National Park leh Pabitora Wildlife Sanctuary te hian kawng hrang hrangin harsatna an tawk mek a, sanctuary huam chhung hmun eng emaw zat chu tui lian hian a chim tawh a ni. State forest minister Promila Rani Brahma chuan sanctuary bul hnaia chengte chu fimkhur tur leh thuneitute thlawp turin a lo ngen tawh bawk.