NSCN (K) hruaitu hlui pahnihin party thar din an tum

Khaplang-a kaihhruai Nationalist Socialist Council of Nagaland (NSCN-K) hruaitu hlui pahnih- Y. Wangtin Naga leh P. Tikhak te chuan political party thar din an tum thu an tarlang.

NSCN (K) helpawlin sorkar laipui nen inkahhai thuthlung a neih theihna atana hmalatu - Cease Fire Supervisory Board (CFSB)-ah Wangtin hi hruaitu a ni.

Hruaitu hlui pahnihte hian Pathiannia thuchhuah an siam­ah NSCN (K) chairman S.S. Khaplang-a'n kar kalta Zirtawpni, March 20 khan an pawl aṭanga a hnawhchhuah thu an tarlang a, political party thar an din tur chuan Naga mipuite hmasawnna tur bakah remna leh muanna a awm theih nan a bei dawn a ni, an ti.

NSCN (K) leh sorkar laipui chuan kum 14 chuang inkahhai thuthlung an nei mek a, mahse thuthlung hi kumin April 27 hian a tawp dawn a ni. Hemi chung­chang hi ngaihtuahin March 20 khan Dimapur-ah CFSB meeting neih a ni a, meeting-ah hian NSCN (K) aiawhin Wangtin leh Tikhak te an tel a ni.

Khaplang chuan Zirtawpnia meeting neih zawhah inkahhai thuthlung neih chhunzawm a duh loh thu a sawi a, mahse Wangtin leh Tikhak chuan CFSB meeting-in inkahhai thuthlung neih chhunzawm zel a duh thu an tarlang thung.

NSCN (K) hruaitu hlui pahnih­te hian an chairman-in an pawl aṭanga a hnawhchhuah avangin an duh dana mipui rawngbawl turin an zalen tawh tih an tarlang bawk a, pawl aṭanga hnawhchhuah an nih avang­a Naga mipuite'n an hlawkpui dawn phawt chuan vawi 100 chuang pawh hnawhchhuah nih pawi an tih loh thu an tarlang tel bawk.

Hetihlai hian Manipur-a hel pawl paruk inzawmkhawm- Coordination Committee (CorCom) chuan NSCN (K) chairman Khaplang-a'n kum 14 chuanga upa, inkahhai thuthlung neih chhunzawm a duh tawh lo chu lawmawm an tih thu an tarlang. CorCom-ah hian KYKL, PREPAK, PREPAK (PRO), KCP, UNLF leh RPF helpawlte an tel.

CorCom publicity convenor chuan thuchhuah a siamah, inkahhai thuthlung chhunzawm tawh lo tura NSCN (K) Chairman-in thutlukna a siam chu thil dik a ni, a ti a, India sorkar chu hmarchhak bial mipuite hmelma a ni, a ti.