Chief Minister Zeliang-a'n Ministry a la siksawi lo

March 19-a budget session a tawp hnuah Nagaland Chief Minister TR Zeliang chuan ministry a siksawi rin a ni a, mahse Chief Minister chuan hemi chung­changah hian tun thlengin thuthar a la siam lo.

Chief Minister Zeliang-a laka hel Nagaland Peoples Front (NPF) MLA te'n kumin January thlaa Chief Minister paihthlak an phut avang­a party buaina a thlen hnuah kumin February 5 khan special session-ah Chief Minister Zeliang-a hi fiah a ni a, member 60 awmna assembly-ah member 59-in a thlawp lamah vote an thlak a ni.

NPF party chhunga buaina vang hian Chief Minister chuan a laka hel cabinet minister ṭhenkhat a ban a, ṭhenkhat an duh thu ngeiin an bang bawk. Hei vang hian cabinet minister post li a ruak a, post ruak hi tun thlengin hnawhkhah a la ni lo.

Zeliang-a kaihhruai sorkar buaina vang hian rorellai NPF chu pawl hnihah a phel a, NPF president Shürhozelie-a kaihhruai bakah Noke Wangnao leh G.Kaito Aye-a kaihhruai pawl an awm a, pawl hnihte hian NPF party neitu nihna inchuhin, Election Commission of India-ah an zual ko a ni. ECI chuan March 27 khan thuchhuah a siam a, pawl hnihte thubuai chu party chhunga chinfel tur a ni a, hei vang hian Shürhozelie-a pawlte chuan party neitu nihna an la chang chhunzawm zel a ni.

Noke leh Kaito pawlte chuan March 27-a ECI thuchhuak chu February 4-a thuchhuah a lo siam tawh tihnghehna a ni, an ti a, party buaina chu chinfel a nih hma chuan pawl hnihte'n eng hmalakna mah an nei thei rih lo, an ti.

Hetihlai hian Chief Minister Zeliang-a chuan a ministry chu April thla tirah a siksawi rin a ni a, cabinet post ruak hnawhkhah a nih bakah minister te portfolio siksawi a ni bawk ang.