ONGC-in gas laihchhuah tihpun tum

Oil Natural Gas Company (ONGC) chuan hmarchhak biala gas leh tui­alhthei zawn hna a thawh mek chu ngawrh zawka kalpui a tum thu leh, gas a laichhuah zat chu tihpun a tum thu a tarlang.

ONGC Onshore activities-a director ruat thar, V P Mahawar chuan he thu hi Pathianni khan a sawi a, gas leh tuialhthei laihchhuah dan kalphung thar- 'hydro-fracturing system' hmangin an thil laihchhuah chu tihpun an tum thu a sawi.

"Tripura-a gas khur hluiah thla thar aṭangin 'hydro-fracturing system' hi hman ṭan tum a ni a, India rama gas leh tui­alhthei mamawh sang zel phuhruk nan ram pumah a zawnchhuah leh a laih­chhuah hna hi ngawrh zawka kalpui a ni ang," a ti.

Mahawar chuan khaw­vel puma gas reserve aṭangin India-in 0.7 per­cent chauh gas reserve a neih thu leh oil reserve 0.3 percent chauh a neih thu a sawi a, hei hian kum 4 aṭanga kum 5 thleng chauh a daih dawn a ni, a ti a, hei vang hian tun lai thiamna sang leh khawl changkang zawk hmanga gas leh tuialhthei laih­chhuah chu thil ṭul a ni, a ti.

ONGC hian Tripura-a gas awmna bial 11-ah khur 176 a verh tawh tih Mahawar chuan a sawi a, heta ṭang hian kum 1972 aṭang khan khur 82-ah gas an laihchhuah thu a sawi bawk. Tripura-a gas zawn­chhuahnaa an hlawhtlinna avang­in ONGC chuan power megawatt 726 siam­chhuak thei, Palatana power project-in kum 20 chhunga a hman tur gas cubic meter nuai 36 an supply theih phah dawn niin a sawi.

Tripura-a gas laih­chhuah zat chu kum 2012-a standard cubic metres nuai 17 aṭangin tunah chuan standard cubic metre 44-ah a pun tawh thu a sawi bawk.