Garo Hills-ah NGO-in bandh huaihawt dawn

West Garo Hills Deputy Commissioner (DC) Pravin Bakshi-a'n Garo Hills-a NGO- Association of Democracy and Empowerment (ADE) chu vawiina bandh an huaihawt tur kaltlangpui lo tura a ngen hnuah ADE chuan kaltlangpui a tum thu a tarlang.

"March 31 chu finan­cial year tawp ni a nih avangin mi zawng zawng tan ni pawimawh a ni a, bill leh sorkar hnathawk thla hlawh chingfel ngaite buaipui hun a ni a, bandh huaihawt a nih chuan a pawi thui thei viau dawn a ni," tiin DC Bakshi chuan a sawi.

Mi ṭhenkhatin ADE office an suasam avangin an lungawi lohna lantir nan ADE chuan bandh huaihawt a rel a ni.

Bakshi chuan ADE office suasamnaa in­hnam­hnawihte chu chhui­­chian mek an nih thu sawiin, senior police officer kaih­hruaina hnuaiah chhuichian hna thawh mek a ni, a ti a, pawikhawihtu chu hrem ngei an nih tur thu a sawi bawk.

West Garo Hills district SP Mukesh Singh pawhin ADE office suasamnaa inhnamhnawihte chuangah action lak a nih thu a sawi. "ADE office suasamna kaihhnawihah police constable pahnih lakah action lak a ni tawh a, pakhat chu suspend tawh a ni a, pakhat pawh suspend tura a chungchang bawhzui mek a ni," a ti.

Hetihlai hian ADE official chuan bandh chu kaltlangpui tum mahse an office khawihtute chu man an nih vek chuan bandh huaihawt loh an remtih thu a sawi bawk.