M'laya police te'n GNLA hruaitu an man

Meghalaya police te'n Garo National Liberation Army (GNLA) hotu an man nia an sawi chu thudik lo tia GNLA thu­chhuahin a tarlan hnuah DGP Rajiv Mehta chuan tun hnai khan GNLA joint publicity secretary an man thu a sawi.

"Finfiahna kan neih aṭangin GNLA joint publicity secretary, Mandei Ch Marak chu kan man tawh tih kan chiang a ni," tiin DGP Mehta chuan a sawi.

Meghalaya police thuchhuak chuan GNLA hruaitu Mandei Ch Marak chu March 27 khan West Garo Hills district headquarters, Tura-ah a ngaihzawng nen man an nih thu a tarlang a, Marak-a chu an la kawl thu leh a ngaihzawng chu bail-a chhuahtir a ni tih a tarlang.

GNLA joint publicity secretary Marak hi kum 21 mi niin, BA first year zirlai a ni a, social media-ah GNLA thuchhuak a thehdarh ṭhin a ni.