Tripura: NLFT leh ATTF te'n inremna ziak Amit Shah-a'n tih hlawhtlin ngei a tiam

Sorkar laipui chuan kum 35 chhung state sorkar laka hel tawh, National Liberation Front of Tripura (NLFT) leh All Tripura Tiger Force (ATTF) te chu Nilaini khan inremna thuthlung (tripartite peace agreement) a ziahpui.

Union home minister Amit Shah chuan Tripura-ah remna leh muanna a awm ngei theihna turin, inremna thu an thlunte chu sorkarin a ti hlawhtling vek dawn tih helpawlte a tiam.

Inremna thuthlung hi Tripura chief miniter Manik Saha leh senior official-te hmaah North Block-ah ziah niin, sorkar laka hel mi 328 chuang an lo kir a ni. Helpawlte'n sorkar laka an phut lian ber, tribal-te awmna hmun tih hmasawnna turin sorkar chuan Rs vbc 250 a dah nghal bawk.

Shah chuan Modi sorkar chuan hmarchhak pumpui hmasawnna a ngai pawimawh tih sawiin, a bikin tribal-te culture, ṭawng leh identity humsak chu a tum ber a nih thu a sawi. Hmarchhak huam chhungah inremna thuthlung 12 ziah a nih tawh thu leh, helpawl mi 10,000 chuang an ralthuamte nen an rawn kir tawh tih a tarlang.

NLFT hi March 12, 1989 khan din niin, tharum hmanga India ram aṭanga inla hranga independent Tripura state din chu a tum ber a ni. Unlawful Activities (Prevention) Act, 1967 tlawhchhanin kum 1997, April thla khan an pawl hi helpawlah puan an ni.

ATTF hi July 11,1990 khan Tripura National Volunteer member ni ṭhin intelkhawmte'n an din a ni. He pawl hi NLFT ralthuam kengtu pawl ni tura din nia sawi a ni a, mahseNLFT aṭang hian inla hrangin anmahniin pawl an din ta zawk a ni.

Inremna thuthlung ziah ni vek hian sorkar laipui chuan inkahhai puanga National Socialist Council of Nagaland (K) Niki nen inremna an ziah chu September 8 aṭanga chhiarin kum khat atan an pawtsei leh bawk.