Assam Accord Clause 6-a rawtna tam zawk kalpui dawn

Assam sorkar chuan kumin April 15-a Ministry of Home Affairs (MHA) in a ruat panel-in, Assam Accord Clause 6 atana rawtna a siam zinga a tam zawk chu a taka kalpui a ni dawn tih a sawi.

Chief minister Himanta Biswa Sarma chuan Nilainia North Lakhimpur-a cabinet meeting an neih zawh hnuah hei hi sawiin, Justice (retired) Biplab Sarma kaihhruai committee in rawtna a siam 67 zinga 57 chu a taka kalpui a ni dawn a ni, a ti. A bak 10 erawh chu sorkar laipui an la sawipui leh dawn niin a tarlang.

State chhunga dan loa lut, ram dang mite thawn kir an nih phuta kum ruk chhung zet sorkar nawr a lungawi lohna lantir a nih hnuah, kum 1985, August thla khan Assam Accord hi ziah a ni. He Accord-a clause tam zawk chu kalpui ni tawh mah se, Clause 6-a Assamese te dikna chanvo humhim sak chungchang hi kalpui a la ni lo. Hei hi 'Assamese' tia sawiin a huam chin tura an inlungrual theih loh vang nia sawi a ni.

CM Sarma chuan rawtna 57-te kalpuina turah hian All Assam Students' Union leh organisation dangte pawh an sawipui dawn tih tarlangin, hlawhtling taka kalpui a nih theihna turin ruahmanna pawh kan duang vek a ni, a ti. Sixth Shedule area hnuaia awm, Bodoland Territorial Region, Dima Hasao Autonomous Council, leh Karbi Anglong Autonomous Council thuneitute hnen aṭangin remtihpuina pawh a la ve dawn niin a sawi bawk.