Manipur: JAC-in drone hmanga thah ruang an la duh lo

Manipur-a drone hmanga beihna Koutruk khua beihnaa hmeichhe thi ruang chu Joint Action Committee (JAC) chuan an hlawm duh lo.

Chief minister N Biren Singh-a'n JAC-te thil phut tih hlawhtlin tiam mah se, JAC chuan Ngangbam Surbala ruang chu la duh loin, CM chu a thutiam ti hlawhtling hmasa phawt turin an phut.

Chief Minister leh JAC aiawhte chuan Nilaini khan CM secretariat-ah meeting an nei a, an meeting-ah hian JAC convenor Ningthoujam Popilal chuan an thil phutte chu CM hnenah a thlen a ni.

JAC thil phut zingah hian Pathiannia Koutruk beitu helte leh, he thil thlenga helpawl inrawlh zawng zawngte man vek turin sorkar an phut. Hei bakah hian, sorkar laipui chu Kuki helpawl nena inkahhai thuthlung, Suspension of Operation (SoO) an neih mek laka inhnukkir tur te, Meitei ho khawsakna hmun Koutruk leh a chhehvel khua aṭanga Assam Riffle lachhuak turin an phut tel bawk.

JAC chuan Meitei awmna khaw kilkhawrahte state force dah an phut bakah, sorkar chu mitthi chhungte ngaihsak turin an phut a ni.

An inbiakna kalzelah CM chuan hmeichhe ruang chu post-mortem a nih hnuah la turin JAC chu hriattir mah se, JAC chuan Chief Minister-in a thutiamte a hlen hma loh chu ruang an lak loh tur thu an sawi thung.

Hetih lai hian Manipur CM N Biren Singh chuan JAC-te nena an inbiakna neih chungchang chu social media-ah tarlangin, "Mipuite thinrimna leh tawrhna chu thuk takin ka hriatthiampui a, sorkar chuan he thil thleng chungchangah hian a ṭul angte ti turin rang tak leh ṭha takin hmalak a tum a ni," a ti.