NE-ah pre-paid mobile service la hmang chhunzawn dawn

Sorkar laipui chuan hmarchhak bial leh Jammu & Kashmir-ah pre-paid mobile service chu kum hnih chhung hman a la remti.

Hmarchhak bial leh Jammu & Kashmir-a telecom operator te'n pre-paid service an pekna licence hi nimin khan a tawp a, vawiin aṭangin kum hnih dang pre-paid service an kalpui leh rih dawn a ni. Hmarchhak bial leh J&K-ah hian pre-paid subscriber maktaduai 33 chuang an awm.

Pre-paid mobile service chung­changah hian Union Home Secretary LC Goyal-a kaihhruaina hnuaiah Thawhṭanni khan high-level committee neih a ni a, sawi hona neih a nih hnuah kum hnih chhung pre-paid service kalpui rih tura thutlukna siam a ni.

Home Ministry chuan pre-paid service kalpui rih tura phalna a pek rualin service provider te chu SIM card an pekchhuah kawngah fimkhur tur leh an pek turte ngun taka enfiah turin a hriattir bawk.

Hmarchhak bial leh J&K hi ramria awm a nih vangin ram venhimna kawngah a pawimawh a, hemi vang hian kum 2009 khan Department of Telecom chuan pre-paid mobile phone service a lo titawp tawh, a kum lehah a khapna chu hnukkirin SIM card pekchhuah dan khauh zawka kalpui turin a ti a, subscriber te enfiahna nei turin operator te a hriattir bawk.

Hetihlai hian hmarchhak bial leh J&K-a Pre-paid SIM card te hmun dangah hman theih a ni dawn lo a, hmun danga SIM card pek­chhuahte pawh heng bial hnihah hian a hman theih loh bawk ang.