Monarchak power plant-in power siamchhuak ṭan

West Tripura district-a power megawatt 100 pechhuak thei, Monarchak power plant chuan Thawhṭanni khan power siamchhuah a ṭan.

Project coordinator Asit Chowdhury chuan he thu hi sawiin, Monarchak power plant aṭangin a enchhin nan power siamchhuah an ṭan thu a sawi a, kar khat hnu velah hralhchhuah atan power an siamchhuah theih a beisei thu a sawi.

Monarchak plant hi gas hmang power plant niin, North East Electrical Power Corporation (NEEPCO)-in a enkawl a, Oil and Natural Gas Corporation Limited (ONGC)-in gas a supply.

Chowdhury chuan Kho­wai district, Ramchan­draghat-a gas hmang thermal power project, megawatt 84 siamchhuak thei chu combine cycle project-a siam a nih thu sawiin, hemi aṭang hian power hralh­chhuah tur, megawatt 26 an siambelh thu a sawi.

Monarchak project hnuaia green project kal­tlangin solar power mega­watt nga siambelh a ni bawk.

Monarchak plant hman theih a nih leh tak avangin Tripura chu power mamawh aia tam siamchhuak thei state a ni ta a, Gomati district, Palatana thermal power project aṭanga power megawatt 726 a siamchhuah chu hmarchhak state dangah a hralh chhuak mek a ni.

Palatana project aṭang hian megawatt 100 chu transmission line peihfel a nih hnuah Bangladesh hnena pek a ni bawk ang.