Fund tihtlem avangin Assam-in sorkar laipui sawisel

Assam sorkar chuan kum 2011 aṭangin mi nuai 1.2 te tan hnathawh tur a siamsak thu tarlangin sorkar laipuiin fund a ruahman a tihtlemsak chu a sawisel.

State Planning Development Minister Ajanta Neog chuan he thu hi sawiin, Assam-ah industry lian a awm loh avangin sorkarin mipui­te chu hnathawh tur a ngaihtuahsak ṭhin thu a sawi a, kum 2011 aṭangin ṭhalai hna nei lo, mi nuai 1.2 chu hnathawh tur an siamsak tih a sawi.

BJP MLA Ranjit Kumar Das-a zawhna chhangin Planning Development minister Neog chuan head hrang hrang hnuaia sorkar laipuiin fund a pek ṭhin chu tun hnai khan a tihtlemsak thu a sawi bawk.

"14th Finance Commission chuan Assam tana fund a ruahman chu a titlem a, financial year hnih- kum 2015-16 leh kum 2016-17 chhung chauh ṭanpuina pek min tum bawk a ni," tiin Neog chuan a sawi.

State Planning Minister chuan hmarchhak state dangte aia fund an hmuh tlem tur thu a sawi bawk a, sorkar laipui chuan state revenue aṭangin hnathawkte thla hlawh leh pension-ah 35% chauh hman a phalsak thu leh hnathawkte thla hlawh leh pen­sion senso atan 65% chuang an mamawh thu a sawi bawk.

"Thla hlawh leh pen­sion-ah sorkar laipui chuan revenue aṭanga 35% chauh hmang tur­in min chhutsak a, Assam chu revenue surplus state a nih dawn avangin fund pawh tihtlemsak a ngai a ni, tiin a sawi a ni. 14th FC-in fund min rua­hmansak chu ennawn tur­in Chief Minister pawhin a ngen tawh a ni," a ti.

Minister Neog chuan, Assam chu a ram leilung chhiat avangin special category state-a dah a ni a, hei vang hian sorkar laipuiin central project a kalpuinnah 90% fund a pek ṭhin thu leh hei hi tihtlemsak a nih thu a sawi bawk.

"Prime Minister Narendra Modi chuan state leh sorkar laipui thawh hona ṭha (cooperative federalism) chungchang a sawi ṭhin a, mahse kan chanvo kan hmuh loh chuan engtin ngen thawh hona ṭha a awm theih ang? Sorkar laipui ringawt a chak ang a, eng tin nge state sorkar a chak theih ang?" tiin a sawi bawk.