Kuki pawlin Manipur CM chhui an phut: SC-in a ruat official hnenah an zualko

Kuki pawlte chuan Manipur chief minister N Biren Singh chu state chhunga Kuki-te huatna chawkchhuakah puhin, CM lakah hian FIR thehluh a chhui an phut.

Kuki Organization for Human Rights Trust (KOHUR) chuan Manipur tualchhung buaina vil tura Supreme Court-in a ruat officer hnenah zualkoin memorandum an thehlut.

Supreme Court-in Manipur tualchhung buaina vil tura a ruat hi Dattatray Padsalgikar, Maharastra Director General of Police hlui a ni a, a hnenah KOHUR chuan Home Secretary Govind Mohan kaltlangin memorandum an thehlut a ni.

Memorandum thehluhah hian Manipur Chief Minister ni ngeia rin audio putru chungchang tarlangin, CM lakah hian action lak an phut tih an ziak. Manipur sorkar erawh chuan he audio putru hi siamchawp tiin a sawi thung.

He thil thleng hi Kuki pawlte chuan Manipur state chhunga hnam inhuatna nasa tak chawkchhuak tura phiarrukna bakah, Kuki hnam thah chimit tumna leh Kuki-te tihduhdah leh nghaisak tumna a ni tia sawiin, FIR theh lut in chhuichian an phut a ni.

Memorandum an thehluh bakah hian, KOHUR chuan Manipur CM aw ni ngeia ngaih minute 48-a sei audio recording an theh lut tel bawk.

“Hnam leh hnam inkara boruak sosang mek karah hian, Chief Minister ni lai mek chhui tura Manipur police hnena zualko chu thil awmze neiah kan ngai lo. He office hi Hon’ble Supreme Court-in hetiang thil chingfel tura a din a ni,” tiin Kuki pawlte chuan an ziak.

KOHUR chuan audio recording hi chhui chiannaah siamchawp a ni tih hmuh chhuah a nih chuan audio siamchawptute chu dan hmanga na taka hrem turin an phut tih an sawi bawk.

Manipur CM Singh chuan an phutna chu phain, “Mi ṭhenkhatin ka chhiatna duhin min phiarru a ni. He thil hi chhui lai mek a ni a, ka sawi tam lo ang. FIR theh luh tawh a ni,” tiin a sawi ve thung.