Tripura: Agartala airport-in international airport status nei thuai dawn

Tripura khawpui Agartala-a Maharaja Bir Bikram Airport chu international airport-a puan a nih thuai theih nan hma lak mek zel a ni a, hemi atan hian state chhunga airport rauhsan tawh pahnih pawh hman theih turin thuamṭhat mek a ni.

Maharaja Bir Bikram Airport hi international airport-a puan a nih hnuah Tripura leh Chittagong, Bangladesh inkarah thlawhtheihna thlawhtir tum a ni.

Hetih lai hian Bangladesh ram chhungah buaina a chhuah avangin helai hmunah hian thlawhtheihna thlawh tir theih a ni angem tihsorkarin a la sawi chiang thei lo.

Agartala leh Chittagong inkara thlawk tur hian Spicejet thlawhtheihnate tihfel a ni tawh a, hemi atan hian state sorkar chuan Airport Authority of India (AAI) hnenah Rs vbc 15 pek a remti a, December 2022 khan AAI hnenah thla thum atan Rs vbc 3.85 a lo pe tawh a ni.

Hei bakah hian state sorkar chuan Ministry of Home Affairs (MHA) hnuaia Bureau of Immigration tan police 25 a pe bawk a ni.

Hetih lai hian, Civil Aviation Ministry chuan Tripura hmar lama awm, Kailashahar leh Kamalpura airport hman tlak tawh lo chu hman leh theih turin a thuam ṭha mek bawk.

Maharaja Bir Bikram Airport terminal thar hi Rs vbc 438 senga sak niin, January 4, 2022 khan prime minister Narendra Modi-an a hawng.He airport aṭang hian thlawhtheihna 16 thlawk mekin, nitin passenger 4000 vel an awm.

Hmarchhak state zingah Assam khawpui, Guwahati-a Lokpriya Gopinath Bordoloi International Airport (LGBIA) leh Manipur khawpui, Imphal-a Bir Tikendrajit International Airport te hi tun dinhmuna international airport awmchhunte an la ni rih.

Kartir lamah khan, Air India Express chuan Agartala-Guwahati-Delhi-Kolkata inkarah nitin thlawk turin ruahmanna a siam thar a, Tripura leh a ṭhenawm state-te inentir tur leh zirna leh sumdawnna thila West Bengal kal ṭhinte’n an hman ṭangkai beisei a ni.