Assam minister-in hospital compound tihfai nan Ni 10 chhung hun a pe

Assam minister of state for health Pijush Hazarika chuan Pathianni khan Dhubri Civil Hos­pital thuneitute hnenah, hospi­tal leh a chhehvel chu fai leh thiang­hlim taka dah turin a ti a, hemi atan hian ni 10 chhung hun a pe.

 

Pathianni khan minister Hazarika hian hospital hi a tlawh a, hospital ṭawp leh bal chu a ngaimawhthu a sawi. Hospital thu­neitute leh Dhubri district thuneitute hnenah hospital leh chhehvel chu vawng fai reng turin a ti a ni. Minister chuan hospital fai taka enkawl a nih theihna turin state sorkar chuan thla tinin cheng nuai khat a pe ṭhin tih a sawi. Mahse hetichung hian hospital chu an vawng fai tawk lo hle tih sawiin, hei hi thuneitute chuan an ngaizam mai mai dawn lo tih a sawi. 

Dhubri Civil Hospital a tlawh ṭum hian Hazarika hian hospital-a Apollo Dialysis Clinic a hawng nghal bawk. Hei hi Assam state-a Apollo Dialysis Clinic-in free dialysis unit an siam 16-na a ni. He clinic-ah hian khum panga dah a ni. 

Assam sorkar leh Chennai-a hmunpui nei, Apollo Dialysis Centre hian Assam state chhunga health centre hrang hranga dialysis centre siamna turin memorandum of understanding (MoU) an ziak a ni. Inremna an siamah chuan Assam sorkar chuan  Apollo Dialysis Centre hnenah hian damlo pakhat zelah Rs 1,296 a pe ṭhin dawn a ni. He clinic-a damlo enkawlte chu a thlawn veka enkawl an ni ang. 

Assam governor Jagadish Mukhi pawhin nikum September thlaa Dhubri a tlawh ṭum khan district thuneitute leh Dhubri Civil Hospital thuneitute chu hospital an enkawl fai tawk loh avangin a lo sawisel tawh bawk. Governor chuan Dhubri Hospital chu Assam-a hospital bal ber niin a sawi hial a ni.