Private school-te khuahkhirh nan Assam-in dan a siam dawn

Assam-a private school te'n dan anga zirtir­tute hlawh an pek loh vang leh school fee an tihsan ṭhin avangin Assam sorkar chuan a khuahkhirhna dan a siam dawn.

Assembly ṭhut­khawm­ah AGP MLA Keshab Mahanta-a zawh­na chu Education Minis­ter Sarat Borkotoky chuan chhangin he thu hi a sawi a, mimal enkawl English medium school te chuan building sak danah te, zirlaite himna chungchangah te, school fee lak danah te leh zirtir­tute thla hlawh chung­changah dan an zawm ṭhat loh thu a sawi.

"He thil hi Chief Mi­nister hnenah thlen thuai ka tum a, dan thar siamin khuahkhirh kan tum dawn a ni," a ti.

Assam Education Minister Borkotoky chuan private school te hian hriattirna an pek pawh an chhanlet ṭhin loh thu a sawi bawk.

"School fee sang tak an la a, mahse dan angin zirtirtute thla hlawh an pe leh si lo. Zirtirtu lak danah pawh Bachelor of Education degree nei ngei lak tur tih a nih laiin school tam tak chuan an zawm thei lo a ni," a ti.

Education Minister chuan Assam-ah private school 1,167 leh private junior college 420 a awm thu a sawi bawk.