Tripura sorkarin a hnathawkte central pay pe dawn
Sorkar hnathawkte'n 6th Central Pay Commission rawtna zulzuia thla hlawh pek nasa taka an phut hnuah, Tripura sorkar chuan pay band leh grade pay te tidanglamin, 6th CPC rawtna tlukpuiin hnathawkte thla hlawh a pe dawn.
Hetihlai hian dearness allowance (DA) erawh kalphung pangngai angin kum khatah vawi hnih pek an ni ang.
Sorkar thutlukna thar hi state sorkar hnathawk nuai 1.60 leh pensioner 52,000 te'n an hlawkpui dawn a ni. Pay thar hi nimin aṭangin hman ṭan nghal a ni.
Chief Minister Manik Sarkar chuan sorkar hnathawkte thla hlawh an pek chu sorkar laipui hnuaia hnathawkte nen a inthlauh avangin 6th CPC rawtna zulzuia thla hlawh pek chu state sorkar hnuaia hnathawkte'n hun rei tak kalta aṭanga an lo phut tawh a ni, a ti.
"6th CPC rawtna zulzuia thla hlawh kan pek loh chhan chu sum leh paia state harsatna vang a ni a, 14th Finance Commission rawtnate Union Budget leh sorkar laipuiin a pawmpui tak avangin state sorkar chuan a hnuaia hnathawkte beisei angin an hamṭhatna tur siam a remti ta a ni," a ti.
Sarkar chuan Group C leh D, fixed pay late thla hlawh pawh ennawn a nih tur thu a sawi bawk a, pay structure thar chuan public sector undertakings (PSUs), autonomous body leh local body hnuaia hnathawkte pawh a huam vek tur thu a sawi bawk.
Tripura Chief Minister Sarkar chuan thla hlawh pun avanga state sorkar sum sen belh tur zat sawiin, kum 2015-16 chhungin cheng vaibelchhe 338.75 an sen belh tur thu a sawi. Thla hlawh atana an sum sen belh tur zat hi kum 2017-18-ah vaibelchhe 487.80-in a pung ang a, kum 2018-19-ah vaibelchhe 560.97 leh kum 2019-20-ah vaibelchhe 645.12-in a pung ang.