SC-in affidavit thar thehlut turin Assam leh sorkar laipui a hriattir

Supreme Court chuan Assam sorkar leh sorkar laipui chu thla thum kalta chhunga National Register of Citizens (NRC) siamṭhatna kalpui dan kimchang thehlut tura hriattirin, hemi atan hian affidavit thar thehlut turin a ti.

Assam-a NRC siamṭhatna kalpui dan chungchanga nikum December 17-a hearing neihah Supreme Court chuan NRC update dan chu thla thum hnuah zel ennawn a nih tur thu a puang a ni.

"Thla thum ral hnua an hmalakna sorkar laipuiin a thehluh chu court-in a ennawn ṭhin dawn a ni," tiin SC thuchhuak chuan a tarlang.

Justice Ranjan Gogoi leh RF Nariman te awmna SC division bench chuan Thawhlehnia NRC update chungchanga an ngaih­tuahah Assam sorkar affidavit theh­luh chu an pawm theih loh avangin affidavit thar siam a, ni 10 chhunga thehlut turin a hriattir a, affidavit buatsaihnaah a ṭul a nih chuan Assam Chief Secretary pun turin thurawn a pe bawk.

Hetihlai hian SC bench chuan sorkar laipui chu thla thum chhunga Bangladesh mi phalna nei lo awmte thawnchhuah dan chungchang leh ramri hung lohte hungna atana an hmalakna leh an thiltih kimchang tarlanna, affidavit chu ni 10 chhunga thehlut turin a hriattir bawk.

Supreme Court chuan NRC update-naa Nodal Officer Prateek Hajela te chu an hmalakna kimchang report thehlut turin a hriattir bawk.