Manipur CM-in Passport Seva Kendra a hawng

Manipur Chief Minis­ter Ibobi Singh chuan Thawhlehni khan Imphal, Old Assembly Complex-ah Passport Seva Kendra office a hawng.

Passport office hi Mani­pur-a a pakhatna niin, Manipur chu India ram Passport Seva Kendra Map-ah a chuang ve ta a ni.

Passport office hawn­nah in­khawmah Chief Minister Ibobi chuan thu sawiin, Imphal-a passport office a nih theihna atana Ministry of External Affairs hmalakna chu lawmawm a tih thu a sawi a, Imphal mipuite chuan passport dil turin Guwahati-a an kal buai a ngai tawh dawn lo a ni, a ti.

Chief Minister chuan Manipur-ah ‘Visa on Arrival’ facility chu a rang lama kalpui a nih theih nan Union Ministry of External Affairs official te chu chak zawka hna kalpui turin a ngen bawk a, Visa on Arrival facility kalpuina atana mamawh tur office leh thil ṭul dangte chu Imphal International Airport leh Moreh-ah state sorkarin a ruahman fel vek tawh tih a sawi.

Asia chhim lam bialah Manipur chu khualzin mite hmun tlawh tam pawl tak a ni, tiin Ibobi chuan Manipur chu ASEAN ram mipuite ram tlawh chak ber pakhat a ni, a ti a, ‘Visa on Arrival’ facility chu peihfel a nih hunah rampawn khualzin lut zat chu a pung chho thuai dawn a ni, a ti.

Passport office hawnna in­khawmah hian Deputy Chief Minister Gaikhangam, Lok Sabha MP Thangso Baite, Rajya Sabha MP Abdul Salam, Chief Secretary PC Lawmkunga leh senior official dangte pawh an tel.

Deputy Chief Minister Gaikhangam pawhin thu sawiin, Imphal-a passport office hawn a nih tak avangin Manipur-in khawvel ram dangte a hnaih phah hle, a ti a, Ministry of External Affairs hmalakna chu Manipur mipuite suangtuahna puitlinna a ni, a ti.

Central Passport Organisation-a Joint Secretary Muktesh K Pradeshi chuan thuchah a sawiah Passport Seva Kendra chu Nagaland, Tripura leh Sikkim-ah te hawn thuai a nih tur thu a sawi.

Pradeshi chuan hmarchhak bialah mi 85,000 velin passport an neih thu sawiin, hun reilote chhungin mi nuai khat an tlin thuai a beisei thu a sawi a, passport lakna atana police verification process neih ṭhin chu tihchak a nih chuan passport chu dilna thehluh aṭangin thla khat chhunga peihfel theih a nih thu a sawi bawk.