Helte lambunnaah Assam Rifle 2 leh hel pakhat an thi

Manipur-a helte'n Ukhrul district, Myanmar ramri hnaiha 44 Assam Rifles te an lambunnaah Thawhlehni khan Assam Rifle pahnih an kaphlum a, pakhatin hliam a tuar.

44 Assam Rifles te hian Thawhlehni zing khan kein Kamjong leh Kongkan khaw inkarah patrol an nei a, zing dar nga leh chanve velah helte'n lo lambunin, silaia an kah hmain improvised explosive device (IED) bomb an tipuak a, a hmunah sipai pahnih an thi nghal a, pakhatin hliam a tuar a ni.

Assam Rifle te hian helte hi an chhanglet nghal a, dar kar khat dawn an inkah hnuah helte hi ram hnuaiah an pilbo zui nghal a, Assam Rifle te hian anmahni beitu hel pakhat an kahhlum ruang an chhar a ni.

Assam Rifle thite hi Havildar NK Dolly leh Havildar BN Kshetri te an ni a, Rifleman GD Shastra-a'n hliam a tuar.

Hetihlai hian Manipur chhuah lama khaw 64 ṭangrual pawl, Eastern Area Tangkhul Villages Association chairman W Shimray chuan Assam Rifle te chunga thil thleng chu an dem thu an tarlang a, helte chuan ramri chhevel boruak muanna an tichhia a ni, a ti.