CM-in Speaker report buatsaih a thlawp a ṭul: AASU

All Assam Students’ Union (AASU) chuan Chief Minister Tarun Gogoi chu Assam leilung fate duhsak tura phutin, tun hnaia Assembly Speaker Pranab Gogoi-a'n Assamese tih hrilhfiahna chungchanga report a buatsaih chu thlawp turin an ngen bawk.

AASU chuan thuchhuah an siam­ah Speaker report buatsaih chu Chief Minister Gogoi-a'n a thlawp lo nia an hriat thu an tarlang a, vanduaithlak an tih thu an tarlang tel.

Chief Minister hna a chelh aṭang­in Gogoi chu Bangladesh mi phalna nei loa Assam-a chengte hum tumah an puh bakah Assam Accord-a thuthlungte tihpuitlin nan hma la loah an puh bawk.

Zirlai pawlte chuan Assembly Speaker report chu pawl hrang hrangte nena sawi hona neih hnuah buatsaih a nih thu tarlangin Assam chanchinah lehkha pawimawh tak a nih zel tur thu an tarlang bawk a, Assam-a hnam hrang hrang te'n an thlawp vek bawk a ni, an ti.

Chief Minister chuan report chu a thlawp loh avangin Assam leilung fate humhalh a tum tak tak lo a ni, tiin AASU thuchhuak chuan a tarlang a ni.

Hetihlai hian Assam tualṭo party, Asom Gana Parishad (AGP) chuan Assamese tih hrilhfiahna atana Assembly Speaker hmalakna chu lawmawm an tih thu an tarlang.

AGP president Atul Bora chuan Congress party leh All India United Democratic Front (AIUDF) chu an vote bawm hum tuma, politics tenawm tak khelah a puh a, Assam leilung fate humhalh nan Speaker hmalakna chu kawng dik a ni, a ti a, party pahnihte chuan an thlawp a ngai a ni, a ti.