Nagaland-a hmeichhe MP hmasa ber a thi

Nagaland hmeichhe zinga Lok Sabha MP hmasa ber leh a awm chhun, Rano M Shaiza chu Ningani khan Kohima-ah a thi.

Kum 86 mi, Shaiza-i hi kum 1977, Lok Sabha term ruknaah member atan thlantlin a ni.

Shaiza hian a fanu pahnih leh fapa pakhat a kalsan a ni.

Nagaland Governor PB Acharya chuan Shaiza chu uiawm a tih thu sawiin, Parliament-a Naga mipuite aiawhtu, hmeichhe chhuanawm tak a nih thu a sawi a, Nagaland mipuite tana a hnathawh chu mipuite'n an hriat reng tur thu a sawi bawk.

Naga mi, Odisha Go­ver­nor SC Jamir pawhin Shaiza thi chu pawi a tih thu sawiin, khawhar chhungte a tawrhpui thu a thawn bawk.

Chief Minister TR Zeliang pawhin Shaiza-i thihna chu Nagaland tan channa nasa tak a ni, tiin Shaiza-i hmun ruak chu tumahin an hnawhkhah theih tawh loh tur thu a sawi bawk.