Tuki-a'n helte pawikhawihna a dem

Arunachal Pradesh Chief Minister Nabam Tuki chuan district pathum - Tirap, Chang­lang leh Longding dis­trict-a hel­pawlte pawi­khawihna thleng ṭhin chu ninawm a tih thu sawiin, helpawlte vanga buaina thleng ṭhin chu chinfelsak thuai turin sorkar laipui a ngen.

Kar kalta Ningani khan Tirap district-ah helpawl te'n Army con­voy lambunin, sipai pathum an kaphlum a, mi dang pathumin hliam an tuar bawk a ni.

"Helpawlte hel chhan­te leh an chung­chang chu chinfel a nih loh chuan pawikhawihna hi a thleng nawn leh thei a ni," tiin Tuki chuan a sawi.

"Helpawlte pawi­khawihna chu a tawpah chuan mipui te, venghimtu sipai te leh state sorkarin a tuar ṭhin a, hei vang hian sorkar laipui chu a chet chhuah thuai a ṭul a ni," a ti.

Chief Minister Tuki chuan Army convoy chunga thilthleng chu a dem thu sawiin, helte chetna nunrawnthlak tak chu an enliam mai loh tur thu a sawi a, police officer te chu muanna a awm theih nan eng tik lai pawha inring renga awm tur leh boruak thlitlai reng turin a ngen bawk.

Governor Lt Gen Nir­bhay Sharma (Retd) pawhin Army convoy chunga thilthleng chu pawi a tih thu sawiin, mitthi chhungte a tawrhpui thu a sawi a, pawikhawihtute chu hrem loha chhuah an nih loh tur thu a sawi.