Tripura ramri km 136-a thui la hung lo

Tripura-a India leh Bangladesh ramri kilo­metre 851-a thui chu kilometre 715-a thui hung a ni tawh a, kilometre 136-a thui hung lohin a la awm.

Hetihlai hian India-Bangladesh ramri kilo­metre 92-a thuiah a hung hna thawh mek a ni, tiin official chuan a sawi.

Ramri hung hna thawk­tu, Costal Con­struc­tion Company Ltd leh NPCC chuan Tripura chhuah lama ramri hung hna an thawh mekah harsatna hrang hrang avangin hna an thawh chak theih loh thu an sawi.

Tripura chhuah lam- Kanchanpur leh Gan­dacherra aṭanga Longtharai inkarah hian ram chhengchhe tak tak a awm bakah ramngaw chhah tak tak a awm bawk a, hmun ṭhenkhatah chuan inkalpawhna kawng mumal a awm lo a ni. Construction Company te hian fur lai chuan hna thawh an chawlhsan a ngai ṭhin bawk.

Ram venhimna lama mithiamte chuan India chhuah lam ram chu an thil ngaihven a nih thu sawiin, Chittagong Hill Tract chu India rama helpawlte luhna a nih thu leh helpawlte ral relna hmun pawimawh a nih thu an sawi.

Ramria inkalpawhna kawngpui chungchangah sorkar laipui chuan kilometre 738-a thui kawngpui sialna tur sum a pechhuak tawh a, heng aṭang hian kilometre 524-a thui kawngpui sial a ni tawh a, kilometre 147-a thuiah kawngpui sial hna thawh mek a ni.

Ramri kilometre 683-a thuia flood light vuahna tura sum pekchhuah tawhah 70-80% vel thawh zawh tawh a ni bawk.