Guwahati-a private school 145 register loh a awm

Guwahati-a private school 145 chu sorkar aṭanga phalna mumal nei lo leh inziak lut lo an ni tih Assam Education de­partment leh Kamrup Metro district thuneitute thu­chhuak chuan a tarlang.

Kamrup Metro district Deputy Commissioner M Angamuthu chuan, "Kamrup Metro district huamchhungah high school leh higher secon­dary school 377 a awm tih survey report chuan a tarlang a, heng zinga 121 hi sorkar school a ni. Private school 252 zinga school 145 chu Edu­cation department aṭanga phalna nei loin an kal a ni," tiin a sawi.

Kamrup Metro DC chuan heng school te hi a rang lama Education department-a inziaklut tura an hriattir thu a sawi.

Inziaklut tura hun an pek chhan sawiin, zirlaite leh zirlai nu leh pate hnena harsatna siamsak an duh loh vang a ni, a ti a, an inziaklut lo a nih chuan dan tlawhchhanin an chungah action lak a nih tur thu a sawi bawk.

Angamuthu chuan school bus chungchang buaipui tura Additional DC Rajib Prakash Barua kaih­hruaina hnuaia Spe­cial Team din chuan school-a venhimna te, fee structure te, zirtirtute leh school building te an endik tel tur thu a sawi.

School bus te khuah­khirhna chung­changa Supreme Court guidelines siam angin Metro district-in school bus 851 a neih thu DC Angamuthu chuan a sawi bawk.

"School bus te hi Transport department-in endik hna a thawk mek a, bus 524 a endik tawhah bus 401 chu fitness certificate a pe tawh a ni. Bus dangte'n safety norm an zawm ṭha em tih pawh a hmunah endik zel a ni ang a, dan an zawm ṭha lo a nih chuan an permit cancel sak thlenga hrem an ni ang," a ti.

Kamrup Metro DC Angamuthu chuan primary aṭanga higher secondary school thlenga class hrang hrangte tan school timing hran siam tuma district thuneitute'n ngaihtuahna an hman thu a sawi bawk.

"Primary, secondary leh higher secondary class hrang hrangte tana school timing hran siam a nih chuan traffic tawt lutukin a ziaawm phah ang," a ti.