Gogoi-a'n sorkar laipui-ah special package a dil

Assam Chief Minister Tarun Gogoi chuan Pathiannia New Delhi-a 'Joint Conference of Chief Justices of High Courts and Chief Ministers of States'-a thu a sawiah hmarchhak bial leh a bikin Assam-a court rorelna tihchak nan sorkar laipui hnenah special package a dil.

Gogoi chuan meeting-ah hian court rorel dana harsatna tlangpui a tarlang bawk.

Assam Chief Minister chuan a thawh khatna atana cheng vaibelchhe 100 senga Assam-a National Law University and Judicial Academy siam mek chu peihfel ṭep tawh a ni, a ti.

Dan hmanga rorelna tih­changtlunna tura infrastruc­ture leh manpower tihchakna kawnga Assam sorkar hmalakna a tarlangin court thar 36 siam nan sum pekchhuah tawh a ni, a ti a, ad-hoc fast track court 20 chu court pangngaia leh a ni tawh a, hmeichhiate chunga pawikhawihna thubuai ngaihtuahtu atan fast-track court 54 siambelh an tum thu a sawi bawk.

Gogoi chuan infrastructure changtlung chho zel avangin court thubuai chinfel loh a tlakhniam thu a sawi bawk a, mahse rorelna dik a hun taka hlenchhuah a nih theih nan kawng thui tak zawh tur a la awm thu a sawi.

Chief Minister Gogoi chuan 13th Finance Commission rawtna angin judicial system-ah sum leh paia inrelbawlna felfai neih a pawimawh thu a sawi bawk a, hemi atan hian sorkar laipui chu state sorkar kuta dah ringawt lo tur leh fund mamawhte rang zawka pechhuak ṭhin turin a ngen bawk.

"India danpui chuan khua leh tui zawng zawngte hnenah social, economic leh political justice pek a tiam a, hei vang hian kan justice delivery system hi a pawimawh a ni. Khua leh tui te hnenah rorelna dik kan hlenchhuah hma chuan democracy-in rah ṭha a chhuah thei lo ang," a ti.

Judiciary leh Executive te'n thawh hona ṭha an neih theihna atan boruak ṭha a awm a pawimawh thu sawiin, "Kan ram danpui thiltum tipuitlinna leh khua leh tuite hnena rorelna dik hlenchhuah chu rorelna dik a ni," a ti.

Assam Chief Minister chuan mirethei te hnena rorelna dik hlenchhuah chu thil pawimawh tak a ni, a ti a, miretheite pawhin rorelna dik chu an ban phak tur a ni, a ti.

Meeting zawhah Chief Minister chuan thuthar theh­darhtute a kawm nghal a, tun thla chhungin a cabinet-ah minister thar pali lakbelh a tum thu a sawi bawk. Hemi kaihhnawihah hian Gogoi chuan Congress president Sonia Gandhi leh AICC general secretary CP Joshi hmuh a tum thu a sawi bawk.