Kût hi khawtlang tana thil hlu a ni: CM Tuki

Arunachal Pradesh Chief Minister Nabam Tuki chuan kût chu khawtlang tana thil hlu a ni, tiin intihhlimna ringawt a ni loin hnam thil leh nunphungte zirna remchang a ni, a ti.

Galo mite thlai thar kût, Mopin festival a telnaah Pathianni khan Chief Mi­nister Tuki chuan he thu hi a sawi a, Galo mite chu an hnam nunphung leh ziate humhalh ringawt loin, Arunachal-a cultural tour­ism tihchangtlunna atana thehlar turin a ngen bawk.

Arunachal-a kût hrang hrang an neih- Tawang festival, Siang River festival leh Pangsau Pass festival te sawichhuakin Tuki chuan kût te chu tourism nena hlawhtling taka kalkawptir theih a nih chuan Arunachal-in a hlawkpui dawn a ni, a ti a, hemi atan hian state sorkarin policy duan a tum thu a sawi bawk.

Mopin festival hi Mopin Festival Cele­bration Committee Itana­gar-in Mopin-Solung ground-ah a huaihawt a, hnam incheina hrang hrang inbelin mi ṭhahnem tak an tel.