Naga te ram humhalh turin an ngen

Nagaland-a tribal leh tlawmngai pawl hrang hrangte chuan state sorkar chu theihtawp chhuaha Naga te ram humhalh tur leh Nagaland map an hman mek chu ennawn turin an ngen.

Assam leh Nagaland ram inchuh chungchanga United Naga Tribes Association of Border Areas (UNTABA)-in tun hnaia Dimapur-a Nagaland Tribes Consultative Meeting a buatsaihah he thu hi sawi a ni.

Meeting chuan Assam Governor nena kum 1947-a Nine Point Agreement an lo ziah tawhte leh sorkar laipui nena kum 1960-a 16-Point Agreement an lo ziah tawhte tlawhchhanin Nagaland sorkar chu Naga ram humhalh turin an ngen tih UNTABA chairman Hukavi T Yeputhomi chuan a sawi.

UNTABA chuan Assam ramri thubuai chu tradition leh history tlawhchhana a rang lama chinfel a nih theih nan ngaipawimawh turin an ngen bawk.

Bengal Eastern Frontier Regulation 1873 tlawhchhana Nagaland-a inner line permit system lekkawh mek chu ennawn tur leh tihchangtlung turin UNTABA chuan state sorkar a ngen bawk.