Meghalaya Chief Minister Sangma an la boycott

Meghalaya Chief Minister Mukul Sang­ma-a'n Meghalaya me­dia te chu helpawlte tlang­au tia a sawi avanga lungawi lo, Meghalaya Editors’ and Publishers’ Association (MEPA) leh Shillong Press Club (SPC) te chuan Chief Minister leh kaihhnawih chanchinthar ni 15 chhung an tichhuak tawh lo.

MEPA leh SPC chuan Chief Minister-in a thusawiah ngaihdam a dil hma chuan Chief Minister chu la boycott chhunzawm zel an tum thu an sawi.

State Assembly Bud­get session-ah March 10 khan Chief Minis­ter Mukul chuan state chhunga dan leh thupek dinhmun chu thil pawimawh tak a nih avangin media-te khuahkhirhna dan khauh tak siam a tum thu a sawi a, hemi chungchangah hian state dang chief minister te bakah, Prime Minister leh India President te hnenah lehkha thawn a tum thu a sawi bawk.

Chief Minister chuan hmarchhak bial hmel tibaltu pakhat chu media a ni, a ti a, sorkarin hmar­chhak bial tourism tihchangtlun tuma khual­zin tam zawk hip luh a tum laiin, media te chu hmarchhak bial chanchin ṭha lo theh­darhah a puh a ni.

Chief Minister Mukul chuan assembly inkhawmah vek March 25 khan journalist te chungchang hi sawi chhuak lehinin, journalist te chu hel pawlte thuthar thehdarhsaktu leh chanchinthar an tihchhuah man laah a puh leh a ni.