NRC 1951 khawih chingpentu chhui dawn

7th April, 2015

Mi rinawm lo ṭhenkhatin Assam-a National Register of Citizens (NRC) of 1951 update kalpui mek an lo khawih chingpen nia sawi chu sorkar laipuiin a chhuichiantir dawn.

Assam district pakhat NRC 1951 record khawih chingpenna chu hailan tawh a ni a, hetihlai hian district dang record pawh khawih chingpen rin a ni.

Ministry of Home Affairs (MHA) Joint Secretary (North East) Sambhu Singh chuan tun hnai khan Kamrup district NRC chu khawih chingpen a ni tih complaint an dawn thu a sawi a, 1951 record-ah hian hming thar eng maw zat ziah belh a ni, a ti.

Singh chuan clerk pakhatin dan palzutin hming thar hi a lo belh nia a rin thu a sawi bawk.

NRC 1951 khawih chingpen chhuichiang turin MHA chuan Assam-ah team tirh thuai a tum thu MHA Joint Secretary Singh chuan a sawi a, kum 1951-a NRC lo buatsaih tawh chu ennawn vek a theih loh tur thu leh district dangah hming belh a awm em tih erawh endik a nih tur thu a sawi.

Singh chuan sorkar laipuiin Assam-a NRC siamṭhatna neih mek chu dik taka kalpui a duh thu sawiin, NRC siamṭhatna tlawhchhanin India khua leh tui dik takte hnenah chauh photo identity card siamsak an nih tur thu a sawi bawk.

NRC update nan sorkar laipui chuan fund mamawhte a ngaihtuah thu leh NRC update dan chu ngun takin a enpui vek thu a sawi bawk a, Supreme Court pawhin dik taka kalpui a nih theih nan a enpui thu a sawi bawk.

Assam-a NRC buatsaih hi kum 1951 chhiarpui neih hnua India leh khua dik takte chhinchhiahna a ni a, tuna a siamṭhatna kalpui mekah hian kum 1971, March 24 thleng Assam electoral roll-a telte chu India khua leh tui dik taka chhiar an ni ang. NRC update nan hian state pumah NRC Seva Kendra (office) 2500 hawn a ni a, heng office-ah hian mi tupawhin an chanchin record leh an thlahtute chanchin an enfiah thei ang. Tun thla chhungin dilna semchhuah a ni ang a, July thla chhunga thehluh vek tura ruahman a ni bawk. Dilna an dawn kim hnuah draft NRC tlangzarh a ni ang, tihdik ngai tihdikna leh complaint-na hun hawn a ni leh ang a, hemi hnu hian NRC final tihchhuah a ni ang.