MHA-in NSCN-K Dan pawnah hnawl chhunzawm

Ministry of Home Affairs (MHA) chuan Thawhṭanni khan hriattirna tichhuakin, Nagaland helpawl, National Socialist Council of Nagaland-Khaplang (NSCN-K) chu Unlawful Activities (Prevention) Act (UAPA) hnuaiah dan pawna hnawl, unlawful association-a puan chhunzawm zel a nih thu a tarlang. 

Ministry chuan NSCN-K hi kum 2015-a inkahhai puan an hnawl hnuah sorkar laipui chuan dan pawnah a hnawl tih a sawi. Hemi hnu hian ṭum 104 zet pawikhawihna thlennaah he pawl hi inhnamhnawihin, heng thil thlengah hian security force mi leh sa pasarih leh civil mi parukin nunna an chan a, civil mi 75 rukbo an ni bawk tih a sawi. 

MHA chuan, "NSCN-K hian Naga hnam chenna bialah mahnia inrel­bawlna hran siam tuma beiin India sorkar lakah an hel chhunzawm reng a, sorkar laipui leh Nagaland, Manipur leh Arunachal Pradesh state sorkarte pawisa loin dan kalh zawng leh pawikhawihna thleng zawngin an che reng bawk a, mipuite tithlabarin an tichiai fo a ni," a ti. 

Sumdawng, sorkar official leh civil mi dangte rukbo leh an sum laksak pawh an la ching chhunzawm reng a, pawl member tharte pawh lak belh zelin, international border-ah camp leh bihrukna hmunte an la siam reng a ni, a ti. 

Ram dang mi, India dodaltute thawhpuiin an hnen aṭangin ralthuam leh puihna dangte pawh an dawng fo a,  hemi hmang hian India ram chhungah pawikhawihna leh buaina an thlen ṭhin a ni, tiin MHA thuchhuah chuan a tarlang. 

Sorkar laipui chuan an chet dan hrang hrangte a thlirnawn hnuah, NSCN-K leh a hnuaia pawl peng hrang hrang, wings leh front organisation-te chu dan pawnah hnawl chu a ṭul nia ngaiin unlawful association-ah a puang ta a ni.