Manipur : Nawrh huaihawtte hnawhdarh nan police-ten tear gas hmang

Imphal West district-a hel pawl nia sawi ten drone hmanga civil mite an beihna duh lohna lantirin Pathianni, September 8, 2024 zan khan Imphal khawpuiah mi tam tak an pungkhawm a, pungkhawmte hnawh darh nan police-te chuan tear gas an hmang.

Lungawi lohna lantirte hian Raj Bhavan leh Chief Minister chenna in panin kawng an zawh a, Tiddim road-ah km 3 chuang kawng an zawh hnua high-security zone an thlen dawnin security force-te hian an lo dang a ni. Manipur police leh central security force-te chuan kawng zawhte daidanna turte pawh an lo siam a, hei bakah hnawh darh nan tear gas in an lo phuh bawk.

Security force-ten an lo dan hnuah, nawrh huaihawtte hi Keshampat khawlaiah ṭhu khawmin drone hmanga inbeihna thleng an duh loh zia leh, misualte an man theih loh avanga thuneitute an demna thute an aupui. State police hotute chu bang tura an phut thu an sawi bawk a ni.

Drone hmanga Meitei khua beih a nih avangin Meitei pawl hrang hrang intelkhawm, Coordinating Committee on Manipur Integrity (COCOMI) chuan tiam chin awm loin public emergeny an puang. Meitei zirlai pawlte chuan DGP leh security adviser chu ban an phut bawk.

September 1 khan helpawl nia hriatte chuan Imphal West district-a Koutruk khua chu drone hmanga bomb niin, mi pahnihin nunna an chan bakah mi pakua an hliam. September 2 khan Senjam Chirang khua chu drone hmang bawka beih leh ni bawkin, mi pathumin hliam an tuar. Helai hmun hi a hma nia an bomb na hmun aṭanga kilometer thum vel chauha hlaa awm a ni.

Manipur tualchhung buaina hian ziaawm lam a la pan thei lo a, hetih lai hian buaina chhuahna chhan ber, Meitei hnamin Scheduled Tribe (ST) status pek an phut chungchang Meetei (Meitei) Tribe Union (MMTU) chuan India ram hmun hrang hrangah nasa zawka kalpui an tum tih tun hnaiah an puang thar leh bawk.