Pemlutte khuahkhirh kawngah hmarchhak state-te harh thar

Dan phal loha hmarchhak state-a pemlutte'n nasa taka leilung fate an tihmangan hnuah hmarchhak state lian pathum- Assam, Meghalaya leh Manipur mipuite chuan pemlutte khuahkhirh nan hma an la chho mek zel a, Assam-ah chuan National Register of Citizens (NRC), 1951 update kalpui mek a ni a, mahse hetihlai hian Assamese tih hrilhfiahnaah erawh inhnialna nasa tak a thleng mek a ni.

Meghalaya leh Manipur-ah pawh pemlutte lak aṭanga leilung fate humhalh nan inner line permit syspem emaw a tluk dan khauh tak siam phutin nikum aṭangin pawl hrang hrang te'n state sorkar an nawr a, mahse an thil phut hlawhtlinna erawh tun thlenga hmuh a la ni lo.

Manipur-a inner line permit system kalpui phuttu, tlawmngai pawl hrang hrang inzawmkhawm, Joint Committee on Inner Line Permit System (JCILPS) chuan nasa taka state sorkar a nawr hnuah state sor­kar chuan ILP system chungchang zirchiang turin Deputy Chief Minister Gaikhangam kaihhruaina hnuaiah all political party committee a ruat a, committee chuan state sorkara rawtna a thlen hnuah kumin March thlaa budget session pawtseiin state sorkarin Manipur Regulation of Visitors, Tenants and Migrant Workers (MRVT & MW) Bill 2015 a pass a ni.

JCILPS chuan MRVT & MW Bill 2015 chu leilung fate humhalh­na atan a rintlak loh tiin an pawm thei lo a, hnukkir turin state sorkar an phut leh mek.

Meghalaya-ah chuan zirlai pawl leh tlawmngai pawl hrang hrang 13 inzawmkhawmte chuan kum 2013 kumtluanin nasa takin state pumah ILP movement an kalpui a, vawi eng emaw zat nawrh huaihawtin, nawrh huaihawtte'n vantlang bungrua cheng vaibel­chhe 31 hu an tihchhiat bakah state sorkar chuan ILP activist mi 80 chuang thubuai a siamsak bawk.

Meghalaya Chief Minister Mukul Sangma chuan ILP system chu kalpui theih a nih loh thu sawiin, pemlutte khuahkhirh nan Regulation of Landlord & Tenancy Verification Bill, 2013 a duang a, he bill hi cabinet-in September 27, 2013 khan a pawmpui hnuah mipui­te leh pawl hrang hrang aiawhte nen November 20, 2013 khan sawi hona hun, consultation meeting neih a ni a, pawl hrang hrang aiawhte chuan an pawm thei lo a, meeting aṭangin an chhuak tau a ni.

Meghalaya assembly chuan kum 2013, October 10 khan ILP system kalpuina tur chungchanga eptute resolution putluh pawh a lo hnawl tawh bawk.

ILP system chungchanga Meghalaya sorkar leh tlawmngai pawl hrang hrang inepna hi kum 2014, January 15 khan remna an siam hnuah a tawp a, pemlutte khuahkhirhna atana dan hrang hrang 52 an neih sate chu state sorkarin ennawn a tiam a ni.

ILP system chungchangah hian tlawmngai pawl inzawmkhawm aiawhte leh Chief Minister Mukul Sangma chuan April 29, 2014 khan meeting an nei a, pawl hnihte hian ILP system tihdanglama hman an remti a, Chief Minister chuan pemlutte khuahkhirh nan dan rin­tlak tak siam turin state sorkarin theihtawp a chhuah tur thu a sawi.

Hetihlai hian Manipur-a rorellai Congress sorkar leh JCILPS te inepna hi a la nasa hle a, eptu party Manipur People's Party (MPP) chuan JCILPS te hi an thlawp a ni.

Meghalaya-ah pawh tun hnai khan Khasi Students' Union chuan East Khasi Hills district-a electoral roll siamṭhatna neih mek chu a dik tawk lo tiin, dan an tum a, Public Facilitation Centre (PFC) te chu khar an tum a ni.

Assam-a NRC update kalpui mekah Barpeta leh Chaygaon revenue circle-a update hna kalpui mek chu Barpeta khuaa nawrh huaihawt­te vangin chawlh lailawk a ni. Dan phal loha pemlutte kaihhnawiha nawrh huaihawtnaah hian mi pali-in nunna an chan a, mi eng emaw zatin hliam an tuar bawk.

Assam legislative assembly speaker Pranab Kumar Gogoi chuan pawl hrang hrang 50 chuangte nena sawi hona an neih hnuah tun hnai khan Assamese tihin a huam chin hnamte a tarlang a, Assamese tih hrilhfiahna a siamṭha a ni. Speaker hmalakna hi rorel lai Congress party leh eptu party, All India United Democratic Front te'n an thlawp lo.

Assam leilung fate humhalhna atana kum 1985-a Assam Accord an lo ziah tawh tihpuitlin nan state sorkar chuan Assamese tih hrilh­fiah­na siamṭhat a rawt a ni. Speaker hrilhfiahna thlawp lotute chuan Assamese tih hrilhfiahna atan sawi hona neihah Speaker hian political party te leh pawl eng emaw zat a ko tel lo an ti a, Hindi ṭawng hmangte pawh an tel lo a ni, an ti.

Assembly speaker Pranab-a'n Assamese tih a hrilhfiahna hi Chief Minister Tarun Gogoi pawhin political party te rawn an nih loh avangin a pawm theih loh thu a lo sawi tawh bawk.