Naga peace talk atan hun bithliah a ni lo: Ravi

Nationalist Socialist Council of Nagaland (I-M) leh sorkar laipuiin remna tluantling a awm theihna atana inbiakna an kalpui meka sorkar laipui aiawhtu, Joint Intelligence Committee (JIC) chairman R.N. Ravi chuan inbiak­na an neih hun chhung atan hun bithliah an siam loh thu a sawi.

Ministry of Home Affairs (MHA) Core Group ruala Mani­pur tlawhtu Ravi chuan Thawhṭanni khan he thu hi Imphal-ah a sawi a, "Inbiakna tawp hun atan hun bithliah sorkarin a siam lo a, mahse a rang lama remna tluan­tling kan siam thuai theih nan theihtawp chhuahin hma kan la mek a ni," a ti.

MHA Core Group hian India-Myanmar ramri venhimna chungchang zirchiang turin Manipur an tlawh a ni.

Sorkar laipui chuan December, 2014 khan NSCN (I-M) hruaitute chu thla 18 chhunga inbiakna tihfel hman an lo tiam tawh a ni.

Hun bithliah chungchang hi chanchinthar thehdarhtute'n Naga peace talk interlocutor, Ravi hi an zawt a, sorkar laipuiin Naga hotute hnena a lo tiam tawh aṭang­in Ravi-a thuchhuak hi a danglam a, Prime Minister Narendra Modi leh Union Home Minister Rajnath Singh pawhin Naga peace talk atan hian sorkar laipuiin hun bithliah a siam tur thu Nagaland Chief Minister TR Zeliang hnenah an lo hrilh tawh bawk.

Manipur tlawhtu MHA Core Group-ah hian Ravi bakah MHA joint secretary (NE) Shambhu Singh leh joint secretary (Border Management) HK Makwana te an tel a, helicopter hmanga Chu­rachandpur tlawh tura rua­hmanna siam a nih laiin khaw chhia avangin ṭhulh a ni a, nimin khan Nagaland ramria Jessami khua an tlawh bawk.

Core Group te hian Manipur official te an kawmnaah ram venhimna chungchang leh dan leh thupek dinhmun te an sawipui a ni.

Joint secretary (NE) Shambu Singh chuan Manipur-a India-Myanmar ramri kaltlanga ruihhlo leh ral­thuam tawlh­ruk chu sor­kar lai­­pui­in a ngaihmawh thu leh hel­pawlte'n security force te an lambun ṭhin chu an ngaimawh thu a sawi.

Naga peace talk-a interlocutor Ravi-a hnena cabinet status pek a ni chu lawmawm a tih thu Shambu chuan a sawi bawk a, hei vang hian peace process chu chak zawkin a kalpui theih dawn a ni, a ti.

NSCN (I-M) leh sorkar laipui hian August, 1997-a inkahhai thu­thlung an ziah hnuah remna tluan­tling siam tumin vawi eng emaw zat inbiakna an nei tawh a ni.