Sorkarin Arunachal-ah AFSPA pawtsei

Sorkar laipui chuan sipai te thuneihna sang neihna dan, Armed Forces (Special Powers) Act, 1958 chu Arunachal Pradesh hmun tam zawkah a pawtsei.

Hmarchhak bial leh Jammu & Kashmir-a lekkawh mek, AFSPA zirchiang turin UPA sorkar chuan kum 2004 khan Justice B P Jeevan Reddy-a kaihhruaina hnuaiah commission a din a, commission hian June 6, 2005 khan report a thehlut a, report chuan AFSPA hi hmarchhak bialah hlih a rawt a ni. UPA sorkar chuan commission rawtnate hi mumal taka tihpuitlin a nei lo a, BJP kaihhruai NDA sorkar pawhin commission rawtna hi a hnawl a ni.

Ministry of Home Affairs joint secretary (NE) Shambu Singh chuan hemi chungchanga March 27-a thuchhuah a siamah Assam ramri-a Arunachal Pradesh district zawng zawngte chu AFSPA, 1958 Section 3 tlawhchhanin "disturbed area"-a puan a ni tih a tarlang a, AFSPA chu kum khat dang pawhsei a ni ang, a ti.

Arunachal district pathum- Tirap, Changlang leh Londing district te chu "disturbed area"-a puan an nih bakah Arunachal-Assam ramri aṭanga Arunachal lama kilometre 20 bial chhung chu "disturbed area"-a puan a ni bawk.

Arunachal-Assam ramri bial chhung­ah hian NDFB (S), NSCN (IM), NSCN (K), ULFA (I), KLO, MPLF helpawlte an awm a ni, tiin thuchhuak chuan a tarlang.