Assam-a Adivasi helpawl hotu an man
Assam-a All Adivasi National Liberation Army (AANLA) helpawl hotu, Pipar Dang leh midang pali chu Pathianni khan Assam police te'n Nagaland ramri-ah an man.
Assam police te hian AANLA helte'n March 27-a an ruk bo- Mono Karmakar leh Amit Duttamibo te chhanchhuahna atan beihpui an thlak a, him taka an chhanchhuah bakah helpawl hotu leh midang palite hi an man tel a ni.
AANLA hel pali an mante hi - Isaque Bag, Fabinos Surin, Sangphai Lothanaga leh hmeichhe pakhat, Lily Kikone te an ni a, an hnen aṭangin pistol leh a mu eng emaw zat an man tel bawk.
AANLA hi Adivasi hnam, Assam thingpui huan hrang hranga hnathawkte humhalh tura kum 2006-a din a ni. Assam thingpui huana hnathawkte hi British hun laia, British sipaite'n India hmun hrang hrang aṭanga thingpui huana hnathawk tura an hruai luhte an ni a, a tam zawk hi Adivasi hnam an ni.
AANLA hi Assam helpawl, ULFA leh Naga hel, NSCN-IM te'n an thawhpui a, Assam district pathum- Golaghat, Karbi Anglong leh Kokrajhar district-ahte an inzar pharh a ni.