Inkahhai thuthlung palzuttute chu ngaihthiam an ni lo ang: Rijiju

Hmarchhak biala helpawlte hnenah thuchah khauh tak pein Union Minister of State for Home Affairs Kiren Rijiju chuan inkahhai thuthlung palzut ṭhin helpawlte chu ngaihthiam an nih loh tur thu a sawi.

"Helpawlte'n inkahhai thutlung an palzut leh a nih chuan an chungah action lak a ni nghal ang. Inkahhai thuthlung kan puanna huam chhungah eng helpawl mah an awm kan phal lo," a ti.

Union Minister Rijiju chuan Arunachal Pradesh chu Nationalist Socialist Council of Nagaland (NSCN) helpawlte nen inkahhai thuthlung an puanna area a nih avangin Arunachal Pradesh-ah NSCN helte an chet theih loh thu a sawi bawk.

April 2-a sipai pathum thihna thlentu, Arunchal, Tirap district-a sipai convoy lambunna chungchang sawiin Rijiju chuan pawikhawihtute'n Myanmar ram an luh tawh thu a sawi a, sorkar sipaite lambunna thleng ṭhin ven nan MHA chuan ruahmanna a siam mek a ni, a ti.

"Helte'n inkahhai thuthlung an palzut chhunzawm zel a nih chuan kan chhanlet ve mai a ngai ang," tiin Rijiju chuan a sawi bawk a, Tirap-a sipai lambuntute chungah action lak ngei an tum thu a sawi bawk.

Helpawlte nena remna zawnga inbiakna neih chungchangah Rijiju chuan helpawlte'n pawikhawihna leh tharum thawhna an bansan hma chuan inbiak theih a nih loh thu a sawi.

"Inbe tur chuan helte'n sorkarah an ralthuam an pek hmasak a ngai a, anmahni chhawmdawlna ṭha ngaihtuahsak kan inhuam reng a ni," a ti.

Political level-ah helte inbiakna neihpui an tum tawh loh thu sawiin, remna zawnga inbiaknaah sorkar laipui chuan a aiawh tur, interlocutor a ruat zel ang, a ti.