Imphal-ah Catholic school khar vek

Manipur khawpui, Imphal-a Catholic school te chu a vawi hnihna atan Thawhlehni aṭang khan khar vek an ni.

Catholic school te hi helpawlte hnena vauna an dawn avanga khar an ni, tiin report chuan a tarlang.

Catholic school pakhata thawk chuan Thawhlehni khan class hmasa ber an neih hnuah school thuneitute'n school khar tura an hrilh thu a sawi a, a chhan erawh an sawi lang lo, a ti.

Hetihlai hian helpawlte hian an thil phut tihpuitlin a nih hma chuan school thuneitute hi school khar turin an vau niin an sawi.

Kumin March thla khan Imphal-a Catholic school te lakah helpawlte chuan sum tam tham tak phutin, an thil phut an pek hma chu school khar turin an lo hriattir tawh bawk.

Kangleipak Communist Party (KCP)-MC helpawl chuan Thawhṭanni khan “Operation Mangal” kalpui an tum thu an puang a, Thawhlehni aṭangin Catholic school te hi an khar nghal a ni.

“Operation Mangal”-ah hian KCP-MC helte chuan zirna-in hrang hrangte school fee lak dan bakah admission leh reservation siam dante endik hna kalpui an tum a, a endik turin special vigilance group a din a ni.

‘Operation Mangal’ an tlangzarh ṭumin KCP-MC helte chuan Catholic school te chu an rawtna siam an tihpuitlin theih loh avangin tiam chin awm loa khar vek tura an hriattir thu an lo puang tawh bawk.

KCP-MC helte chuan Catholic school te chunga an ṭanhmun chu an la tihdanglam loh thu Thawhṭanni khan tualchhung chanchinbu kaltlangin an puang leh a ni.