India nena sumdawnna tur B'desh-in a pawm
Insumdawn tawnna tihlenna atana India-in trade agreement revision a buatsaih chu Bangladesh-in a pawm.
He thuthlung siam thar hmang hian India chuan ram danga bungrua a thawnchhuahna kawngah Bangladesh rama lawng kalna kawng leh lirthei kawngpuite a hmang thei dawn a, Bangladesh pawhin India rama kalkawngte chu a hmang thei bawk ang. Trade agreement revision hi hmarchhak bial pawhin a hlawkpui thei dawn a ni.
Hmarchhak bial ṭhenawm India ram state dangte bakah Bangla-desh, Nepal, Myanmar leh Bhutan-te insumdawn tawnna kawnga bungraw phurhnaa harsatna awm ṭhin chu 'revised trade agreement' hian a tihziaawm phah dawn a, India chuan Bangladesh kaltlangin hmarchhak state-te leh Myanmar-ah bungrua a thawnlut thei tawh ang.
Trade agreement hi ram pahnihte'n an dodal a nih loh chuan kum nga hnua renew zel tur a ni ang.
Bangladesh Prime Minister Shaikh Hasina kaihhruaina hnuaia cabinet meeting chuan Thawhṭanni khan trade agreement revision hi a pawm a, Prime Minister Narendra Modi-a'n Dhaka a tlawh hun emaw PM Hasina-in India a tlawh hunah remna tluantling siam a ni ang.
Dhaka leh New Delhi hian kum 1972 khan trade agreement hmasa ber an ziak a, he inremna hi kumin March 31 khan a tawp a ni.
Inremna thar an siam angin Bangladesh chuan India ram bakah Nepal leh Bhutan-a bungrua a thawnluh theih nan India rama lirthei kawngpui, lawng kalkawng leh rel kawngte a hmang thei bawk ang a, Nepal leh Bhutan-a truck te pawhin Bangladesh an luh theih nan India rama kawngpuite an hmang thei bawk ang.