Sixth Schedule amend-na tur bill Law Ministry-in tikhawtlai

Meghalaya-a Auto­nomous District Council te seat tihpunna atana India danpui, Sixth Schedule amend-na tur draft bill chu Union Mi­nistry of Law and Justice-ah tikhawtlai a nih thu Union Ministry of Home Affairs official-in a sawi.

Garo Hills Auto­nomous District Council (GHADC) term a tawp hnuah Meghalaya sor­kar chuan inthlanna buatsaihsak loin, hun eng emaw chen an term a pawtsei tawh a, hemi hnu hian vawi thum lai Administrator’s Rule-ah dah nawn a ni tawh bawk.

Meghalaya sorkar chuan hetianga a tih chhan hi Sixth Schedule amend hun a nghah vang a ni, a ti a, mahse tun hnaia budget session neih zawh takah Sixth Schedule amend-na tur bill hi putluh a ni lo.

Meghalaya-a ADC te seat tihpun hi nikum September 14-a Achik National Volunteer Council (ANVC) leh ANVC-B helpawlte nena sorkar laipuiin remna thuthlung a ziahah a tel a, Sixth Schedule amend a la nih loh avangin ANVC leh ANVC-B helpawlte chhawmdawlna tur pawh tihkhawtlai a ni bawk.

MHA official chuan Sixth Schedule amend-na tur draft bill chu Union Law Ministry-ah a la tangkhang thu a sawi a, hna hautak tak a nih thu leh committee-te din a la ṭul thu a sawi.

MHA official chuan ADC seat tihpunna tur Meghalaya-ah chauh a nih loh tur thu leh hmarchhak state zawng zawngah a nih tur thu a sawi bawk.

Sixth Schedule amend-na hian hun a la duh rei dawn avangin GHADC term pawh hi pawhsei a ngai leh dawn a ni.