AASU-in observer ruat a phût

All Assam Students’ Union (AASU) leh Assam-a hnam hrang hrang pawl 26 te chuan National Register of Citizens (NRC) update kalpui mekah observer din turin sorkar laipui an phût.

AASU leh pawl 26 aiawhte meeting chuan he thutlukna hi Thawhlehni khan a siam a ni.

AASU adviser Samujjal Bhatta­charya chuan mi ṭhenkhatin NRC, 1951 an khawih chingpen nia sawi chu sorkar laipui leh state sorkarin an ngaihpawimawh a ṭul thu leh, pawikhawihtu chu zawn chhuah a, hrem ngei a phût thu a sawi bawk.

NRC update kalpui meka observer ruat a pawimawh chhan sawiin Bhattacharya chuan Election Commission-in inthlannaa observer a ruat angin sorkar laipui chuan NRC update-na enpui turin observer a ruat a ṭul a ni, a ti.

Assembly Speaker Pranab Gogoi-a'n Assam hnam hrang hrangte tarlanga, Assamese tih hrilhfiahna report a tlangzarh chu meeting chuan lawmawm a tih thu a tarlang bawk, Speaker report buatsaih chu sorkar laipui leh state sorkar pawhin pawmpui se an tih thu a tarlang bawk.

Sorkar laipui leh Assam mipui aiawhte'n kum 1985-a Assam Accord an lo ziah tawh a, clause 6 hnuaia Assam mite tana reservation siamna atan Assamese tih hrilhfiahna hi Speaker Pranab Gogoi-a'n a hrilhfiah a ni.

Speaker hrilhfiahna dodaltute leh pawmpui lotute chu meeting chuan vauin, Assam leilung fate thil duh chu tumahin an dodal tur a ni lo, a ti.