NDPP, NPF-in Kohima-a bawng talh khap thlawpna lantir tumna dodal

Nagaland khawpui Kohima-a bawng talh khap thlawpna progamme, 'Gau Dhwaj Sthapana Bharat Yatra' neih tum chu rorellai leh BJP thawhpui, Nationalist Democratic Progressive Party (NDPP) leh Naga People Front (NPF) chuan nasa takin an dodal.

Thawhṭanni September 9, 2024 khan NDPP chuan thuchhuah siamin, "Nagaland mipuite aiawhtu party an nih angin, state mite dikna chanvo humhalh a, an tihdan phung leh an duhdante chu an dah pawimawh ber thu an tarlang". Yatra buatsaih tumtute chu Nagaland-a hun hman an tum chu ngaihtuah ṭha leh turin an ngen a, hei bakah state sorkar pawh tualchhunga sakhaw inlungrualna leh in unau tawnnate a nghawng hmaa hma la a, inrawlh thuai turin an ngen bawk.

"Constitution of India-a Article 371A chuan Nagaland-a cheng Naga mi leh sate sakhua leh tihdan phungte a venhimsak a ni. State sorkar pawhin he Article 371A benchhan hian bawng talh khapna, Cow Slaughter Act 2019 pawh a hmang ve lo a ni," an ti.

NDPP chuan Nagaland Assembly leh sorkar ngaihdan chu a la ngai reng a ni tiin, hetih laia bawng talh khap duhtuten programme hman an tum chu Naga mipui rilru tih natna leh state chhunga sakhaw hrang hrang inlungrualna tichhe thei a ni tih an sawi.

NPF Legilature Party hruaitu Kuzholuzo(Azo) Nienu pawhin Thawhṭanni khah thu chhuah siam ve bawkin, Kohima-a bawng talh khapna programme siam tum chuan a ṭhawng hle tih sawiin, he programme hman tumna hi a dodal bakah a rawt tute chu na taka a dem thu a sawi a, hetiang programme hman tum hi miin a ei duh zawng an thlan theihna tura zalenna an neih laka inrawlhna a ni, a ti.