KSU-in anmahni thua ILP kaltlangpuiah sorkar a vau

Khasi Student Union (KSU) chuan Pathianni khan sorkar laipui leh Meghalaya state sorkar chu vau khanin, Meghalaya state chhungah Inner Line Permit (ILP) hman a nih theihna tura sorkarin hmalakna mumal a neih thuai loh chuan anmahni thuin an kalpui dawn tih an sawi.

KSU president Lambokstarwell Marngar chuan ILP hman a nih theihna tura kum 2019-a resolution pass a nih tawh hnuah pawh, sorkar laipui chuan hmalakna mumal engmah a la nei lo, a ti.

“Kum 2024 kan hmang mek tawh a, sorkar laipui chuan resolution hi a la zirchiang mek chauh a ni,” tiin Margnar chuan a sawi. Zirlai pawl chuan leilung fate chu thawhpuiah sawmin an state chhunga dan loa lutte lo dan zel an in tiam.

Dan loa lutte dang tura dan siam Meghalaya Residents Safety and Security Act, 2016 chu an hman loh avangin state sorkar pawh demin, Marngar hian state sorkar chuan MRSSA 2016 chu engtikah nge hman ṭan a tum, tiin a zawt. ILP hman a nih theih nana kum 2019-a resolution pass kha MLA 60-in an thlawp thu sawiin, hma lak a hun tawh takzet a, “ILP hi keimahniin kan kaltlangpui mai dawn tih hi sorkar hnenah chiang takin hriattir kan duh,” a ti.

KSU President chuan ṭhangkhat lian zet an nghah hnuah pawh sorkarin dan loa an state-a lo lutte dang turin hmalakna mumal engmah a nei lo chu beidawnthlak a tih thu a sawi.

Kumin July thla khan KSU chuan Ri-Bhoi district-a National Highway 6 hrula Pahammawlein khuaah dan loa lutte dang turin ILP check gate an lo siam tawh a ni.