Manipur : District 3-ah pawn chhuah khap

Manipur-a district pathumah zirlaiten nawrh an huaihawt avangin tiam chin awm loin pawn chhuah leh punkhawm khapna thupek puan a ni.

BNSS Section 163 (2) hnuaiah Imphal East leh West district-ah tiam chin awm loin pawn chhuah khap a ni a, Thoubal district-ah pawh mi panga aia tam punkhawm khap a ni bawk.

Thawhṭanni khan Imphal-a Manipur Secretariat leh Raj Bhavan bulah Meitei zirlai ṭhahnem takin lungawi lohna an lantir a, tun hnaia drone hmanga Meitei khua beitute chungah hremna lekkawh tur leh, an state humhim turin thuneitute an phut a ni. Zirlai pawl aiawhte hian chief minister N Biren Singh leh govenorr Acharya pawh an hmu bawk a ni.

Governor hnenah hian an thil phut paruk thehlutin, heng zingah hian Director General of Police (DGP) leh state sorkar-a security advisor-te chu an mawhphurhna kengkawh zawh loh vanga ban tura an phutna pawh a tel.

Hei bakah hian CRFP DG hlui, Kuldiep Singh-a kaihhruai, Unified Command chu state sorkar kuta dah turin an phut tel bawk a ni.

Police-te chuan zirlai nawrh huaihawtte hian venhim hna thawktute chu lungin an tawng niin an sawi a, hei vang hian hnawhdarhna atan tear gas an hmang tih an tarlang."Police chuan vawi tam tak kal darh tawh turin an ngen a, mahse pungkhawmte hian duh loin tharum thawhna an thlen zawk a, mipui lam aṭang hian police lama silai rawn hmetpuakte pawh an awm a, police pakhat chu a mal vei lamah kah fuh a ni," an ti.

Pungkhawmte hian court complex-a motor pakhat ding chu an ti chhia a, hliam tuar phurtu ambulance chu lungin an vawm bawk.