AFSPA pawhsei Tuki-a'n hriatpui lo

Sorkar laipuiin Armed Forces Special Powers Act (AFSPA) tlawhchhana Arunachal Pradesh district 19 zinga district 12 te disturbed area-a puan hun chhung kum khat dang a pawhsei belh chu Chief Minister Nabam Tuki-a'n a hriatpui loh thu a sawi.

Tuki chuan hemi chungchang hi sawifiah turin sorkar laipui ngen an tum thu a sawi bawk.

North Eastern Council (NEC) meeting tel tura New Delhi-a cham mek Chief Minister Tuki chuan sorkar laipuiin Arunachal Pradesh-a AFSPA a pawtsei thu chanchinthara a hmuh chu mak a tih thu a sawi.

Hetihlai hian official chuan Arunachal Pradesh district 12 disturbed area-a puanna turin Ministry of Home Affairs (MHA) chuan state sorkar a rawn lo niin a sawi. A hmain district pathum- Tirap, Changlang leh Longding chauh hi disturbed area-a puan a ni a, AFSPA lekkawh a ni.

Tuki chuan hemi chungchangah hian Union Home Minister Rajnath Singh hmuh a rin a ni a, an lungawi loh thu thlen a tum.

MHA joint secretary (Northeast) Shambu Singh chuan March 27-a th­u­chhuah a siamah Assam ramri lam, Arunachal Pradesh district 12 te chu AFSPA, 1958 Section 3 tlawhchhanin "disturbed area"-a puan a ni tih a tarlang a, AFSPA chu kum khat dang pawhsei a ni ang, a ti.

Sorkar laipui chuan Assam-Aru­nachal ramri chhehvelah NDFB (S), NSCN (IM), NSCN (K), ULFA (I), KLO, leh MPLF helpawlte an chet ṭhin avangin Arunachal-Assam ramri bial chhung hi disturbed area-a puan a ni, a ti.