Catholic school hawn phalsak rawh u: Gaikhangam

Manipur Home department enkawltu, Deputy Chief Minister Gaikhangam chuan April 7 aṭanga Imphal-a Catholic school zawng zawng khat an nih vek hnuah school khar tura vautu pawlte chu school hawn phalsak leh turin a ngen.

Gaikhangam chuan zirlaite zirna tibuai zawng leh school-a zirna boruak tichhe zawnga hma la lo turin school kharnaa a mawhphurtu pawlte chu a ngen a ni.

Deputy Chief Minister chuan pawl ṭhenkhat hmalakna avanga school khar chu thil pawm theih a nih loh thu a sawi a, mahse hetihlai hian school kharnaa a mawhphurtute chunga state sorkar hmalak dan tur erawh a sawi tel lo.

April 6 khan Kangleipak Communist Party (KCP)-MC helpawl chuan “Operation Mangal” kalpui an tum thu tualchhung chanchinbua tarlangin, operation hnuaiah hian zirna-in hrang hrangte school fee lak dan bakah admission leh reservation siam dante endik hna kalpui an tum a ni. KCP-MC helte chuan Catholic school te'n an thil phut an tihpuitlin theih loh avangin khar an tum thu an lo puang tawh bawk.