Insawifiah turin HC-in sorkar laipui leh state sorkar a hriattir

Foreigners Tribunal leh court te'n dan phal loha Bangladesh mi Assam-a chengte an finfiah hnuah an chanchin hriat zui loha awm ṭhin chu Gauhati High Court chuan a ngaihmawh thu tarlangin, hemi chungchangah hian sorkar laipui leh Assam sorkar chu insawifiah turin a hriattir.

Foreigners Tribunals leh High Court-in Assam-a phalna nei loa awm Bangladesh mi a finfiah tawhte chu National Register of Citizens (NRC) update kalpui mekah telh lo turin NRC thuneitute hriattir an ni tawh em tih sawifiah turin Gauhati HC chuan state sorkar a hriattir bawk.

Foreign mi tia tribunal leh court-in an finfiah tawhte thawnkirna atana an hmalakna tarlang turin HC chuan sorkar laipui leh state sorkar a hriattir bawk a ni.

"Sorkar laipui leh state sorkar te'n foreign mi dapchhuah te, thubuai siamsak te leh an rama thawnkir a ngaipawimawh lo lutuk hi a vanduaithlak hle," tiin HC thuchhuak chuan a tarlang.